سلسلة حقوق المرأة | نيرة و المساواة
الشراكة المزيفة
"هل المساواة تعني تدفعي نص كل حاجة؟"
هالة كانت فاكرة إن المشاركة = حب، وإن الزواج مشروع شراكة "طوبة فضة وطوبة ذهب". دفعت نصف ثمن الشقة وكل مصاريف البيت، لكن فجأة لقت نفسها مطرودة… وحقوقها بتضيع. في مركز حقوق المرأة، جلست قدام نيرة الحقوقية تحكي حكايتها، واكتشفت إن المساواة الحقيقية حاجة تانية خالص.
في ظهيرة هادئة، دخلت هالة إلى مركز حقوق المرأة. كان وجهها شاحبًا، وعيناها متعبتين من كثرة التفكير. توقفت أمام مكتب الاستقبال.
هالة: صباح الخير.
الموظفة: صباح النور يا فندم، أقدر أخدمك إزاي؟
هالة: عندي مشكلة مع أبو ابني، ومعنديش مقدرة أوكّل محامي خاص. قالوا لي أروح المركز هنا.
الموظفة: اتفضلي يا حضرتك، املي الاستمارة دي.
ملأت هالة الاستمارة بصمت. بعد دقائق، عادت الموظفة بابتسامة:
الموظفة: بالصدفة الأستاذة نيرة موجودة من بدري شوية، وهتقدر تشوفك دلوقتي.
هالة: شكراً.
الموظفة: اتفضلي، الأستاذة بانتظارك.
دخلت هالة المكتب.
نيرة: صباح الخير.
هالة: صباح النور.
نيرة: اتفضلي بالجلوس.
جلست هالة بتردد أمام مكتب نيرة الحقوقية.
هالة: أنا مش معايا فلوس لمحامي خاص… لكن محتاجة حد يفهمني أعمل إيه. كل حاجة اتقلبت عليّ فجأة.
ابتسمت نيرة بابتسامة دافئة وقالت:
نيرة: احكيلي من الأول يا مدام هالة، خدي وقتك.
---
حكاية هالة
تنهدت هالة، وكأنها تفتح صندوقًا من الذكريات المؤلمة:
هالة: بدأت القصة يوم جلسة التعارف مع زميلي في الشركة. قال لي بكل ثقة: "البيت السعيد يتبني طوبة فضة وطوبة ذهب… بالمشاركة في كل حاجة."
أنا صدقته، ووافقت إننا ندفع نص بالنص حتى في الشقة.
لكن أخويا وقتها اعترض بسخرية:
"يعني يبقى أكسب لو اتجوزتي واحد زي ده؟! هو مش هيحبل ولا يولد ولا يكنس ولا يمسح مكانك."
كنت شايفة إن الشراكة حب، وإنه طبيعي ندفع سوا. المجتمع بيضغط على أي بنت تعدي التلاتين من غير جواز، والكل يقول: "اللي بييجي بييجي طمعان في مرتبها." كل صحابي اتجوزوا بالطريقة دي، فقلت ليه لأ؟ مكنتش أعرف إن كل جنيه بدفعه، بيجي على حساب حقي في النهاية.
ابتسمت نيرة بمرارة:
نيرة: كملي يا هالة.
هالة: اشترينا الشقة… دفعت نص الثمن، بس العقد طلع باسمه. قال لي: "مؤقت بس عشان البنك، وبعدين نضيف اسمك." ما اعترضتش، كنت واثقة فيه.
بعدين كتبنا القايمة. حاول يكتبها من غير أرقام، وقال: "إحنا مش هنختلف."
حتى الذهب، لما اتكلمنا عن قيمته، قال كلام أنه: "ده هدية العريس لعروسته، محدش هياخده منك، واللي مكتوب في المهر والمؤخر أرقام رمزية عشان الرسوم والحسد." وأنا صدقته… للأسف.
---
بعد الزواج
هالة: بعد الجواز، اكتشفت إنه بيخبي عليّ راتبه، وأنا اللي بدفع كل حاجة: فواتير، مدارس، أكل، كل حاجة. كل ما أتكلم عن المصاريف، يقول لي:
"إنتِ ست وأنا راجل، ما تتكلميش في فلوسي. هو أنا اللي اخترت المدرسة دي؟ إنتِ اللي عايزة كده."
وبعد شوية، بدأ يرميني بكلام جارح:
"ما أنا بدفع، ولا فاكرة نفسك اللي بتدفعي كل حاجة؟ مش كفاية إنك بترجعي من شغلك للبيت وما بلحقش منك غير تصبح على خير وصباح الخير؟"
أهله كمان بدأوا يستغلوني في الفلوس والطلبات. كنت ساكتة عشان البيت يستمر. لكن لما اعترضت، انفجر:
"برا… والطلاق مش هيحصل إلا لو تنازلتي عن كل حاجة. وعيالك مش هتشوفيهم لحد ما ترجعي راكعة."
---
نيرة تتدخل
كانت يد هالة ترتجف وهي تمسح دموعها.
نيرة: إنتِ دلوقتي ساكنة عند أهلك؟
هالة: آه، هو طردني. ورفع عليّ دعاوى عشان يسقط حقي في الحضانة والممتلكات، وبيقول إني ناشز.
أخذت نيرة نفسًا عميقًا، ثم قالت بحزم:
نيرة: بصّي يا هالة…
القانون بيكفل المساواة في الأسرة: حقوق متساوية في الزواج، الطلاق، وحضانة الأطفال.
اتفاقية سيداو مثلًا، في المادة 16 بتقول إن الرجل والمرأة لهم نفس الحقوق أثناء الزواج وعند انحلاله، ونفس الحق في ملكية الممتلكات.
كل فاتورة وإيصال باسمك يحق لك ستؤدي قيمته مصاريف المدارس، العلاج، الأندية ،الكهرباء، الغاز، المياه كل فاتورة بمسكن الزوجية والحضانة ديون عليه يجب ردها القانون بيدعمك
تنص المادة (18) من القانون رقم 100 لسنة 1985 على أنه :-
"إذا لم يكن للصغير مال فنفقته على أبيه وتستمر نفقة الاولاد على ابيهم الى ان تتزوج البنت أو تكسب ما يكفى نفقتها وإلى أن يتم الابن الخامسة عشرة من عمره قادراً على الكسب المناسب فإن أتمها عاجزاً على الكسب لآفة بدنية أو عقلية او بسبب طلب العلم الملائم لأمثاله واستعداده او بسبب عدم تيسر هذا الكسب استمرت نفقته على أبيه ……… …"
وهناك القانون رقم 139 المعدل بأن الأب ملتزم بكافة مصاريف التعليم بداية من مراحل التعليم الإجباري إلا أنه غير ملزم بدفع مصاريف التعليم في المدارس الخاصة، أو التعليم الأجنبي إلا في حالة إثبات القدرة المالية للأب، وكذلك يكون الأب ملزما بدفع المصاريف، والتعديل المستحدث بقانون الطفل رقم 12 لسنة 1999 بالقانون رقم 129 لسنة 2008، أعطى الولاية التعليمية على الصغير "إلحاق الصغير بالتعليم واختيار نوعه"، للحاضنة بدلا من ولی النفس.
النفقات بتكون في حدود ثلث دخله ومن كلامك هو مقتدر فأظن انك مش محتاجه نقدم على نفقة من بنك ناصر لحين الفصل في الموضوع لأنه بيرجع يخصمها من ما تصدره لكِ المحكمة في النهاية.
مدام هالة اللي حصل معاكِ مش مساواة… ده استغلال متغطي بشعار "المشاركة."
المساواة الحقيقية مش إنك تدفعي بالنص، المساواة إنك تكوني شريك معترف بيك قانونيًا، لك حقوق كما عليكيِ واجبات، أما المساهمة في مهام الآخر بين الزوجين لها حدود.
إنتِ معاكِ مستندات تثبت مشاركتك؟
هالة: معايا كل التحويلات البنكية اللي تثبت إني دفعت نص الشقة. وفواتير الأجهزة والذهب، ورسائل على واتساب فيها كلامه إن كل حاجة بينا بالنص.
نيرة: ممتاز. هنبدأ نتحرك قانونيًا.
هنطالب بـ:
ضم الصغار.
حيازة المسكن.
أجور (أجر مسكن، أجر حاضنة).
بدلات (كسوة صيف وشتا، بدل حلاقة للطفل).
نفقات بأنواعها الثلاثة لكِ وللأولاد.
مصاريف مدارس بالايصالات اللي باسمك.
فواتير المياه والكهرباء والغاز لو باسمك ومعاكي إيصالات.
هنرد على دعاويه ونثبت طاعتك وطرده ليكي. وبعد ما نثبت الضرر وحقوقك، هنرفع ضده طلاق للضرر لو مفيش أمل ترجعي له. الموضوع محتاج صبر، لكن القانون معاكِ لو اشتغلنا صح.
---
النهاية
هالة (بحزن): أنا غلطانة إني وثقت زيادة؟
نيرة: إنتِ مش غلطانة إنك حبيتي. الغلط إنك شاركتي من غير ما توثقي. المشاركة بالنص من غير ورق = خسارة أكيدة.
التوثيق مش عيب… معناه إنك بتحمي نفسك وكرامتك.
رفعت هالة رأسها وشعرت أن صوت نيرة كان أشبه بجرس إنذار:
نيرة: البيت السعيد يبنى بالتوازن والاحترام المتبادل في العلاقات والمهام والمسؤوليات.
القوامة المالية للمعيشة وسداد احتياجات البيت والأولاد ده دور الرجل الأساسي. مساهمتك مش لازم تكون نص بالنص… المشاركة هي مشاركة عقلانية بتحافظ على كرامتك وأمانك.
غير كده… البيت بينهار.
